27‏/04‏/2008

الله يرحمك يا جاهين


ياملونين البيض في شم النسيم
لون الحنين والشوق وخمر النديم
ماتعرفوش سايق عليكوا النبي
تلونوا الايام بلون النعيم ؟
عجبي

10‏/04‏/2008

عـــــــــــــــــــــــــــــودة





الان فقط اعلم حقا كم كان بعدي عن التدوين مؤلما

واكثر من تالم هو.. انا
الان
لن اقدم اعتذارات او تبريرات لبعدي السخيف
فقط
املك الكثير لاقوله هنا
في مساحتي الصغيره هذه
حتي وان لم يقرأه احد
يكفيني تماما..
انني ارغب في تدوينه
..................................
كل من تألم لبعدي
لكم كل حبي

14‏/10‏/2007

عني

يا نسيم الفجر ريان الندي ما الذي تحمل من دار الحبيب
فرح الكون يلقياه غدا والأسي غيمان فى عين الغريب
غرد الطير وغنى كل ألف يتهنى
وأنا قلبى حنا أرسل الشكوى وأنا
آهة تترى
مقلة حيري
تبصر الأحباب من بين الدموع رائح منهم وغاد
وترى بالظن أيام الربيع لخيالى وفؤادي
يا نسيم الفجر ناديا بالزهر
رنم الدوح ورن الجدول وسرت فى الجو أنفاس العبير
وبدا النور فصاح البلبل داعيا للشدو أسراب الطيور
والنجوم فى الغيوم لبست منها نقاب
والشفق في الأفق لونه ورد مداب
كل ما فى الكون بشر وهنا وأنا ؟
أنا مازلت غريبا مفردا فى ديار عزني فيها النحيب
فرح الكون يلقياه غدا والأسي غيمان فى عين الغريب
________________
الاغنيه دي بسمعها كتير الايام دي
يمكن علشان عايش قوي قوي مع نفسي؟؟
يمكن لاني ابتديت اشوف الغيوم اكتر من الاول؟؟
انا عن نفسي مش عارف

30‏/08‏/2007

انا

طول عمري كنت بحب الافلام العربي
علشان في الاخر البطل دايما بيتجوز البطله
دلوقتي
غصب عني بتنزل دمعة
وانا مش لاقي اسمها
في تتر النهاية

20‏/07‏/2007

.

ليه يا حبيبتي ما بينا دايما سفـر؟
ده البعــد ذنــب كبيــــــر لا يغتفر
ليه يا حبيبتي ما بينا دايما بحور؟
أعدي بحـــر ألاقــي غيره اتحفر
........................
صلاح جاهين

09‏/07‏/2007

تحذير

يا جماعه
المدونة دي
http://masaseldemma2.blogspot.com/
بتاعه مصاص الدماء
وهو فعلا مصاص دماء
وحرااااااامي
لانه سرق بوستات من
عوليس وزرياب وغادة وجيفارا ونسب البوستات دي لنفسه
فياريت البوست ده ينشر في البلوجات كلها
منعا لاستمرار المهزلة
........................
تحديث
بناءا علي اقتراح مصاص الدماء نفسه
وسعيا الي كشف كذبه
فهذه بعض اللينكات التي استطعت الحصول عليها
..........................
البوست الاخير عنده



مسروق من غاده


وهذا اللينك يثبت ذلك

...............................
بوست اخر يتكلم عن السعادة



مسروق ايضا من عند غاده

وهذا هو اللينك

.............................
بوست اخر



مسروق من جيفارا

وللاسف الشديد البوست ليس موجود الان

ولكن هذه صورة مخبأة منه

وهذا لينك تلك النسخه المخبأة ولكنني اظن انها لن تستمر طويلا


...................................

ولنا عودة اخري مع لينكات جديدة

..........................................

تحديث اخر

بوست اخر


http://masaseldemma2.blogspot.com/2007/07/blog-post.html

مسروق من عوليس

وللاسف الشديد القصيدة ليست موجوده الان

وهذه صورة مخبأة منها

وهذا لينك الصفحة المخبأة
http://66.102.9.104/search?q=cache:rqCaxvHNT-8J:klaket.blogspot.com/2006/03/blog-post_19.html+%D8%A8%D9%8A%D8%A8%D8%A7%D8%B3+%D9%8A%D8%B6%D8%AD%D9%83&hl=ar&ct=clnk&cd=1&gl=eg


......................................
تحديث اخير
تم اسدال ستار النهايه علي تلك المهزلة باعتراف مصاص الدماء بسرقته
رغم انه احب ان توضع النهايه في شكل درامي
الا ان بوسته الاخير يوحي بانه لن يفعلها ثانية
شيء اخر يوحي بذلك
انه بالفعل حذف تلك البوستات المسروقة
ليس مجرد جعلها درافت بل فعلا قام بحذفها
........................
اشكر كل من اهتم بالموضوع
وارجوا الانتباه يا ساده عسي الا تتكرر ثانيه لاحد منا
.....................
دمتم جميعا بكل ود

02‏/06‏/2007

الفاجومي عندنا.. يا مرحبا يا مرحبا


خبر جميل جدا جدا
عمنا
الفاجومي
احمد فؤاد نجم
دخل عالم التدوين برجليه
ودي
مدونة الفاجومي اللي ناوي يخرب منها الدنيا

31‏/05‏/2007

ممكن فعلا البلد دي تتغير؟؟



بروفه العصيان المدني




زي ما كانت 23 يوليو 1952 ثورة الضباط الاحرار
هتبقي 23 يوليو 2007 ثورة الناس الاحرار
شاركنا
بروفه العصيان المدني
خليك في بيتك.. وارفع علم مصر
..................
للمزيد من التفاصيل اضغط علي الصورة


08‏/05‏/2007

عاشق

..كان متعود دايما
يفتح سوستة صدره
..ويتطمن
ع البنت اللي شايلها في قلبه
..ويحاول يعرف
لو فكر يوم ينساها
..ممكن قلبه يسيبه
ويهرب؟؟

03‏/05‏/2007

يارب دايما تبقي معايا

عندما تعشق.. تُوقف الطبيعة حولك مسارها المعتاد لترقبك للحظات .. بعدها قد تمضي لامبالية بك.. أو تحنو عليك لتصبح ملكا متوجا لجميع العاشقين
وأنت لا تري تلك التقلبات إلا انعكاسا لحالتك العشقية المضطربة بين رفض.. وقبول
فأنت عندما تري قبول محبوبك لعشقك هذا .. تستطيع -بكل سهولة- أن توقف الرياح لتسمع نبضات قلبك الصاخبة
وعندما تتسمع كلمات أصدقائكم عن كلامها عنك.. وهم -بخبث- يتعمدون بتر حديثهم، ليروا نظرة لحوح لاستكماله.. وأنت لاتبخل عليهم بالحاحك، رغم علمك بأنهم سيكملون
وقتها.. تتحول كل رياح الدنيا لنسائم رقيقة تحملك أكفها لعالم لا يعرف غيرالجمال
وعندما تري بسمتها الراضية للفظ حبٍ وجهته لها
وقتها تغلفك تلك النسائم بسحائب وردية لاتري من خلالها غير وجه محبوبك الجميل
وعندما تري حمرة خديها لمشاكسة إحداهن، مبتسمة-الصديقة- ابتسامة محملة بألف معني للفرحة لاتصال قلبين
وقتها قد تفسح لك الطيور-عن طيب خاطر- عن مكان لتحليقك بينها
وعندما تري تلك الغيرة المختفية خلف نظرة لامبالية، وقت حديثك مع أخري (رغم علمها بأن قلبك لن يخفق لسواها)ز
وقتها قد تشعر بقلبك الهائم يأخذ مكانه الطبيعي بين النجوم
وعندما تري محاولاتها المستحية للتحدث عن مستقبلك/مستقبلها .. لكي تشعرك باهتمامها بحياتكما المشتركة
وقتها لن يسعك -صدقا - براح هذا الكون الضيق
وعندما تشعر بها الي جوارك تحتويك
وقتها لن يصبح عسيرا ان تتسامي فوق كل المخلوقات
ولكنك قد تري ايضا بعض الحزن في ملامحها .. وقتها تشعر بنفسك تسقط من ارتفاعك الشاهق هذا .. وصدقا لن ينقذك
الا خوفها عليك من الارتطام المميت.. عندما ترتسم علي وجهها تلك النظرة الحبيبة الفرحة بوجودكما معا
............................................................................
حبيبتي
..ارجوك
..ابقي الي جواري
كي استطيع البقاء بين الملائكة

02‏/05‏/2007

كل عام وانتي جميله

اسماء
كل عام وانت بالف خير
وكل عام وانت بجوارنا
وكل عام وانت افضل شخص في الدنيا
وكل عام وانت من اغلي من عرفت في حياتي
......................
عزيزتي
دمتي بكل ود ومحبه

25‏/04‏/2007

شغف.. مبروك




ياريت يا جماعه نبارك لشغف علي مدونتها الجديده

لحل المشاكل من كل الانواع والاصناف

وياريت برضه نبقي زباينها

وثقوا انها هتقدر تحل المشاكل

اعذروني لاني مش عارف اكتب اكتر من كده علشان عايز اروح احجز دوري عندها

مبروك تاني مرة يا شغف

وانصحك تحطي اغنيه قاضي البلاج في المدونه الجديده

وياريت تتوصي بالحبايب

علي فكرة يا جماعة

ده اعلان مدفوع التمن

09‏/04‏/2007

أمنية

أتمني أن أجد انسانا ما أحكي له كل ما أفكر فيه وأشعر به .. أتكلم معه بدون خوف ولا خجل .. ثم يموت بعد ذلك مباشرة .. حتي لو اضطررت لقتله
نجلاء بدير
............................
أحيانا كثيرة تشعر لكونك آدميا بالرغبة في الحديث .. تأمل أن تتخلص من همومك عبر طيات حديثك .. ورغم ذلك يبقي عسيرا أن تجد من يسمعك .. من تستطيع معه أن تتحدث بحريتك/فطرتك .. وهذه الصعوبة تكمن داخلك .. ربما تعودا منك للإصغاء .. ربما خوفا من صدمتك لعدم تقديرهم الأمر .. وربما رغبة في الاحتفاظ لنفسك بمشاكلك
ورغم رغبتك الأخيرة يأتيك الوقت الحتمي للبوح .. فتُصدم حقا لإعتياد الاخرين صمتك .. فلا يمكنك وقتها التحدث معهم
وعندها يصبح مبررا أن تُصادق من يجلس جانبك في القطار أو الباص .. تتحدث معه بلا حرج .. بلا خوف .. بلا قيود ، تستطيع أن تخبره كل ما داخلك .. علما منك بعدم رؤيته لك بمجرد وصولك محطتك القادمة
ولكن تبقي لك رغبتك الملحة/المستحيلة لمن يسمعك .. ومن تستطيع التحدث معه

29‏/03‏/2007

ولسه ياما نشوف

قل اعوذو
مد بوزه
الجبان ابن الجبانة
كل غدانا
قام لقانا
شعب طيب
كل عشانا
!!!!!!
.........
الفاجومي

28‏/03‏/2007

؟؟

ابنى اللي لسة مجاش
بيرسمك ورده
هي السنين ببلاش
!!ولا مفيش فايدة
!! جاوبني يا بكرة
...........
عمر نجم

26‏/03‏/2007

اه يا بلد

  1. فعلا اللي بيحصل في البلد دي كارثة
    انا هحكيلكوا اللي حصل معايا بالتفصيل النهارده
    والنهارده مش زي اي يوم
    لان ده يوم الاستفتاء العظيم
    اللي هنقول فيه اللي احنا عايزينه بالظبط
    عايزين نغير ولا يبقي الوضع علي ما هو عليه
    ما علينا
    النهارده الصبح جالي واحد من الحزب الوطني خدني من البيت
    ولان امين الحزب صديق شخصي للحاج ابويا والمفروض انه معشم فيا اني مكسفوش بعتلي واحد مخصوص ياخدني علشان اصوت علي الاستفتاء المهيب
    المهم انا رحت لجنتي ومعايا الاخ المندوب ومعايا برضه ورقه مكتوب فيها بياناتي
    الاسم رباعي , اللجنه , رقم القيد الانتخابي
    دخلت اللجنه ادور فيها علي اسمي وطبعا مضيت قصاد الاسم وجيت اخد الورقه علشان اروح ورا الستاره اقول اه او لأ
    لقيت الاخ اللي في اللجنه بيقولي :مش انت وطني؟ طيب اكتبلك انا الاه؟؟
    بصيت لقيت الاخ المندوب بتاع الحزب بيضحكلي
    انا خدتني الجلاله وقلت لسياده :يا ريت احس اني جيت لحد هنا بفايده علشان كده انا هكتب الاه بنفسي
    عدلت وشي الناحيه التانيه وعلمت علي الدايره السودة , وطبقت الورقة ورميتها في الصندوق
    جيت اخرج لقيت الاخ التاني بتاع اللجنه بيقولي :اسمك مكتوب مرتين تعالي امضي تاني
    قلتله - والابتسامه بوسع وشي -: انا لو همضي تاني يبقي اخد ورقة تانيه
    قالي: مينفعش
    قام الاخ اللي جاي معايا من الحزب قاله عيب يا استاذ ده تبعنا
    وبكل بساطه الاخ جابلي ورقة تانية علشان اصوت تاني
    المهم في الموضوع اني خرجت وانا بره اكتشفت اني المفروض اني احط من الحبر الفسفوري بتاعهم
    رجعت -بكل سذاجه- علشان اخد حقي
    لقيت الراجل بتاع اللجنة بيقولي: طيب توسخ صباعك لية؟؟ خليك كده يمكن تنفع في لجنه تانيه
    قمت انا بكل براءة قلتله : طيب ممكن انفع هنا برضه واخد ورقه تالته؟
    قالي: لا .. في اللجنه اللي جنبنا
    خدني مندوب الحزب علي اللجنه اللي جنبهم وقال للاخ اللي فيها : يا استاذ حمدي يا ريت تظبط الاستاذ ده
    طلعتله كارنيه الحزب قام مديني ورقه علمت عليها ورميتها في الصندوق
    لقيته برضه مفيش حبر ولا يحزنون
    سألته عنه قام سألني بكل براءة : وانت عايزه ليه يعني؟
    قلتله بكل براءه برضه :علشان يعرفوا اني صوتت ويدوني بقيت الفلوس
    قالي: وهو في فلوس؟؟!!!!!!!!!!0
    قلتله: طبعا
    بص للي جنبه وقاله: شوف ولاد ..... مقالولناش ان السنادي فيها فلوس
    .......................................
    حطوا نفسكوا مكاني وقولوا لي هتعملوا ايه في المهازل دي؟؟؟؟؟؟؟؟؟

    ****************************************************
    اقرأ ايضا

    بنت مصرية

جبهة التهييس الشعبية


    16‏/02‏/2007

    تاج

    التاج ده كانت بعتتهولي الوردة السودة من فتره
    وانا بعتذر لها عن التأخير في الرد عليه لظروف خاصة
    وأنا أهه بوفي بوعدي وأرد عليه
    .........................
    ايه اللى هيحصل لإيملك لما تموت؟
    معتقدش انه هيحصل حاجة
    الناس اللي بتكلمني علي الايميل يعرفوني شخصيا
    ودول هيعرفوا اني مش هبقي فاضي ارد عليهم
    فمش هيكلموني
    واللي مش هيعرف هيفضل يبعت اوف لاين لحد ما يزهق
    وبعدين هيحذفني من نفسه

    ..............................
    اديت الباسورود لحد قبل كدة؟
    معتقدش اني اديت الباسورد بتاع الايميل لحد قبل كده
    بس تقريبا شغف
    … وغاده يعرفوه
    لان شغف تعرف باسورد البلوج بتاعي
    وغاده كنت اديتها باسورد منتدي كنت بشارك فيه
    ولأن كل باسورداتي واحدة
    فأعتقد انهم ممكن يفتحوا الايميل بسهولة
    ده لو كانوا لسه فاكرين الباسورد
    .............................
    اسمك؟
    سلامـــــــــــــه
    أعتقد انه معروف
    ............................
    اسم الدلع المشهور بيه وسط صحابك؟
    مفيش
    بس اسلام صاحبي مصمم انه لما يكون رايق يقولي سلاكه
    وعموما انا مبحبش الدلع
    ............................
    عمرك؟
    تقريبا 22 سنه ،10 شهور ،25 يوم
    ............................
    برجك؟
    اختلف الفقهاء
    ناس بتقول حمل
    وناس بتقول حوت
    وده عيب انك تكون مولود يوم عيد الام
    بس أنا اقرب للحمل من الحوت
    وبعدين أنا متفرقش معايا الابراج
    ولا بعترف بيها
    ............................
    مجال دراستك؟
    كلية العلوم
    قسم الرياضة والاحصاء
    ..............................
    شخصيتك نوعها ايه؟
    مش عارف بالظبط
    بس في ناس بيقولوا اني جدع
    وناس بيقولوا اني بمثل الجدعنة
    وناس بيقولوا اني حنين
    وبرضه ناس بيقولوا اني بمثل الحنية
    بس أنا متاكد اني بحب اللي حواليا
    وده كفاية
    ...............................
    المود بتاعى؟
    تقدر تقول اني مش عصبي
    بس لما بتعصب مبشوفش قدامي
    ..............................
    وقت فراغك بتعمل فيه ايه؟
    بعمل كباية شاي تقيل سكر زيادة
    واجيب علبة سجاير
    واقعد علي جذع شجرة جنب الترعة
    واسرح
    ...............................
    الاكلة المفضلة؟
    الشاورمة
    ..............................
    الصفات اللى اخدتها من باباك؟
    التدخين
    وتحمل المسؤلية
    والدماغ الناشفة
    ..............................
    الصفات اللى اخدتها من مامتك؟
    الحنية
    والصراحة
    ..............................
    اكتر ست حاجات بتكرهها؟
    احساس عدم الاهتمام من اللي حوالي*
    الكدب*
    الخيانة*
    ان حد يقولي دول تلاته بس مش ستة*
    ................................
    اكتر ست حاجات بحبها؟
    الحب اللي بحق وحقيقي*
    الصداقه اللي من غير مصالح*
    وجود حد من اللي بحبهم حواليا*
    سيجارة مع كباية شاي بعد اكلة معتبرة*
    ايمن ومنير وأنا ، في الغرزة*
    غيرة آية عليا وانا بكلم اي بنت*
    .................................
    الشغل بالنسبة لك؟
    شيء لابد منه علشان أقدر أجيب فلوس
    وحاجه بتثبت لي اني ليا لازمة في الحياة
    .....................................
    الانترنت بالنسبة لك؟
    بحر غويط جدا
    بيخليني أحس اني بعرف أعوم
    ***************************************
    الجزء ده من التاج كانت بعتته كرانيش
    واديني بوفي وعدي باني أرد عليه
    ......................................
    خمس حاجات محدش يعرفها عني؟
    <1>
    زمان وأنا صغير كنت فاقد التركيز -ومازلت- فأفتكر ان ابويا كان بيديني الفلوس علشان أجيب طلبات للبيت , وطول ما أنا ماشي أقعد أردد في أسماء الحاجات اللي هجيبها علشان منساهاش
    علبتين سجاير وباكو شاي واتنين سكر
    علبتين سجاير وباكو شاي واتنين سكر
    علبة سجاير وباكو سكر واتنين شاي
    علبة سكر وخمسه شاي وباكو سجاير
    لحد ما أوصل للبقال أكون مش عارف كام سجاير وكام سكر وكام شاي؟
    ............................................
    <2>
    اكتشفت اخيرا ان أجمل واحدة في الناس اللي حواليا هي أسماء
    وانها لو كانت سمعت كل انتقاداتي اللي بوجهها ليها
    كانت بقيت زيها زي أي واحدة تانية
    خليكي زي ما انتي عايزة يا أسماء
    وما يهمكيش ان أي حد يزعل منك
    ...........................................
    <3>
    اكتشفت برضه اخيرا اني بعمل حاجات كتيرة جدا لمجرد العادة ليس الا
    وانا من جوايا مش عايز ده
    بس برضه بفشل اني أبطل أعملها
    ............................................
    <4>
    اكتشفت اني حبيت حاجات كتيرة لمجرد ان حبيبتي بتحبها
    وكرهت حاجات كتيرة لمجرد انها بتكرهها
    ورغم اني متاكد ان ده غلط
    الا اني برضه لسه بحب اللي هي بتحبه
    .............................................
    <5>
    أنا بزعل من أيمن ومنير لما الاقيهم قاعدين لوحدهم من غيري
    وزعلان من سهر علشان اكتشفت ان في حاجات كتيرة كان المفروض اني اعرفها عنها ومعرفتهاش
    زعلان من نمير علشان حاسس انه اتغير من ناحيتي
    زعلان من ناس كتيرة جدا من اللي حواليا
    ............................................
    <6>
    اني من غيركم زي اليتيم بالظبط
    .......................................
    امرر التاج ده لمين؟
    ولأي حد يمر من هنا ولسه معملهوش

    26‏/01‏/2007

    عيد ميلاد سعيد

    كل سنه وانتي بالف خير
    غاده

    14‏/01‏/2007

    مغلق
    حتي اشعار اخر

    05‏/01‏/2007

    تراهات ما قبل الامتحانات

    للمرة الاولي يتهرب مني أعز اصدقائي .. في الوقت الاكثر احتياجا له فيه
    صديقي العزيز
    لاداعي لكل هذا العناء لإنهاء تلك الصداقه العقيمة.. تكفيني منك كلمة وداع.. لتصبح بعدها صديقا سابقا .. ولكنك ماذلت عزيزا
    ...............................................................
    عادة لا أطيق القراءة الالكترونية. ولذلك لم أقرأكثيرا ل زريـــــاب - ذلك المميز في عالمي الادبي - .. ولكنني بدافع الملل والتغيير قرأت حكايته الاخيرة .. فتندمت كثيرا علي ما فاتني من تلك المتعة
    ................................................................
    كنت أود مشاركة شــغـــف في في فكرتها - تدوينه لكل يوم - لكن ظروف الامتحانات وظروفي النفسية أحالت دون ذلك
    ................................................................
    ..صديقتي الجديدة
    لم اقصد إطلاقا أن أتدخل في خصوصياتك أو أن أسبب لك أي ضيق.. فكما قلت لك سابقا .. انني أحترم - كثيرا - خصوصية الاخرين
    فصدقيني .. لانني بالفعل .. تسعدني صداقتك
    ...............................................................
    أفكر كثيرا في الراحة من أشيائي التافهة الكثيرة
    أحاول أن أحذف البلوج . . أغلق الموبايل . . أترك البيت . . أعتزل الجامعة
    أختفي بضع ايام في مكان لا أعرفه
    وللاسف .. تأخر قراري هذا كثيرا
    ويبدو أنني -أخيرا - قادر علي فعله
    ...............................................................
    ..أصدقائي الأعزاء
    وداعا
    ...............................................................
    .. حبيبتي
    ماذلت أحبك

    25‏/12‏/2006







    Action Blank Post




    .




    22‏/12‏/2006

    يوم التدوينة البيضاء




    يوم الاثنين القادم25/12/2006 هو يوم غير عادي في عالم المدونات التونسية؛ حدث هام ؛ لأول مرة في المدونات التونسية سيتم تجنيد الجميع من اجل هدف واحد؛ أمر أصبح يؤرق الجميع؛ ألا و هو الحجب المتواصل و الغير المفهوم لبعض المدونات التونسية؛ ، يعبّر المدوّنون التّونسيّون عن إحتجاجهم على منع عدد من المدوّنات التّونسيّة عن النّشر في تونس في الآونة الأخيرة
    كلّ مدوّن يرغب في التّعبير عن مساندته يستطيع المشاركة في يوم التّدوينة البيضاء و ذلك بأن ينشر تدوينة فارغة بلا عنوان و لا شيء غير ذلك لمدّة 24 ساعة
    وقد تضامن معهم عدد غير قليل من المدونات العربيه استنادا الي الراي القائل : فلما لا يتحول يوم 25 ديسمبر من كل عام إلى يوم عربي لاحتجاج على الحجب الالكتروني
    فانني اضم صوتي الي صوت
    آدم و احجيوج و جحا
    وغيرهم واعلنها صريحه

    لا للحجب الالكتروني
    راجيا من كل اصدقائي وزواري المدونين الانضمام الي هذه الحمله البيضاء تعبيرا عن قداسه حريه التدوين

    07‏/12‏/2006

    مش فاهم

    ابويا امبارح عمل حاجه عمره ما عملها قبل كده صحاني من النوم - علي غير العاده - وهو مش مكشر - كعادته دائما- 0
    طبعا انا حاولت - كعادتي - اني افهم سر التغير المفاجيء ده
    قالي - والابتسامه تغزو كل وجهه المجعد - : انت اتغيرت يا سلامه فلازم انا اغير تعاملي معاك
    طبعا انا مش فاهم انا اتغيرت ازاي , بس مبسوط انه غير تعامله
    {!!!طبعا غريبه ان الواحد يبدأ البوست بأبوه}
    ..............................................................
    واحد صاحبي غالي عندي جدا لاحظت في الايام اللي فاتت ان حركات النداله بتاعته كترت - أصبحت أكثر مما يمكن تحمله - , لما سألته ايه يا بني اللي حصل , قالي شوف انت ايه اللي اتغير فيك؟
    طبعا انا مش فاهم ايه اللي اتغير فيا
    ...............................................................
    حتي البنوته الحلوه اللي في قلبي بتقول : كلهم تغيروا حتي هو - اللي هو أنا - 0
    ...............................................................
    كل اللي حواليا - مع اختلاف ردود افعالهم - اجمعوا اني اتغيرت
    المشكله اني لحد دلوقتي مش فاهم ايه اللي اتغير
    وهو للاحسن ولا - كالمتوقع - للاسوء
    ................................................................
    نداء لكل اللي يعرفوني
    ولكل اللي بيعدوا من هنا - ولو حتي صدفة -0
    اي حد منكم يا جماعه يقولي انا اتغيرت ازاي
    نفسي افهم
    ................................................................
    هو انا فعلا اتغيرت؟؟؟؟؟

    19‏/10‏/2006

    لو نهر النيل صلصة..كانت الطماطم رخصت

    طول عمرنا نسمع عن الكوسه اللي في البلد
    وطول عمرنا عايشين وشايفينها
    بس اي شيء لما بيزيد عن حده بيجيب مغص للبني ادم
    خصوصا لو البني ادم ده واحد حساس جدا زيي-حساس يعني عندي حساسيه- وخصوصا لو الكوسه دي دخلت في النطاق الادبي - مش معني كده انها بقيت مؤدبه ولا بقي عندها ادب- 0
    الموضوع باختصار شديد اننا في النادي الادبي قررنا نعمل مسابقه/لقاء ادبي
    جميل
    وقررنا ان كل كليه يمثلها اربع اشخاص كل واحد في مجال (فصحي , عاميه , قصه , قران كريم)0
    حلو قوي
    وعملنا اللقاء وكله تمام وميت فل واربعتاشر
    فين الكوسه بقي؟
    اقولكم فين الكوسه
    كليه زي الاداب فيها اكتر من عشره شعراء
    ومن قبل ما اللقاء يعلن عنه كان المسؤلين مختارين الشخص اللي هيمثل كليه الاداب في اللقاء ده
    يعني ريحوا دماغهم وريحوا الناس وبدلا من اجراء مسابقه للاختيار واو تقييم الاعمال هما حددوا الشخص اللي هيمثلهم وده حقهم
    المشكله ان اللي هيحكم اللقاءكان دكتور نقد من كليه الاداب اللي عملت المشكله اللي فاتت
    برضه مفيش مشكله
    المشكله بقي فين؟
    اقولكم
    لما الدكتور ده - ومن غير ما يقرا الاعمال يختار المراكز الاولي من الكليه بتاعته نقدر نعديهاله
    ولما الدكتور ده يختار عمل فاز قبل كده بالمركز الاول مرتين مع انه في اعمال تانيه اقيم منه.. برضه ممكن نعديهاله
    ولما الدكتور ده برضه يختار واحد من الكليه بتاعته علشان ياخد المركز الاول عاميه - مع ان الشخص ده مش مشترك في المسابقه اساسا - برضه ممكن نعديهاله
    لكن ان الدكتور ده يختار اتنين من كليته في المركز الاول والتاني في شعر الفصحي مع ان المفروض ان واحد بس هو اللي بيمثل الكليه بتاعته مش اتنين
    ومع ان العمل التاني في الفصحي كان قصيده لفاروق جويده مش عمل خاص بالطالبه اللي قالته
    تفتكروا ممكن نعديها؟؟؟!!!!0
    .............................
    تفتكروا ان الواحد لما يشوف الكوسه وصلت لحد الشعر ممكن انه يمسك ورقه وقلم ويكتب اي حاجه غير انه يسب ويلعن في اللي وصلنا للحال ده
    .............................
    انا مش عارف كتبت البوست ده ليه
    بس عارف كويس جدا اني عايز اقول وبعلو صوتي
    حسبي الله ونعم الوكيل

    13‏/09‏/2006

    تاج

    فعلا انا اعتذر وبشده عن تاخيري في الرد علي التاج اللي بعتهولي سيزيف ولكن ده لظروف خارجه عن ارادتي
    !يلا نبدأ؟
    هل انت راض عن مدونتك شكلا وموضوعا؟
    حاليا راضي عنها شكلا مع اني ممكن جدا بكره اكون مغير شكلها خالص , اما موضوعا دي لسه شويه
    هل تعلم اسرتك الصغيرة بأمر مدونتك؟
    ابدا .. اسرتي الكبيره متعرفش اي شيء عن علاقتي بالنت , ومعتقدش انها لو عرفت كانت هتفرق معاهم كتير
    هل تجد حرجا في ان تخبر صديقا عن مدونتك ؟
    وحرج ليه؟
    هل تعتبرها امرا خاص؟
    مش عارف يعني ايه امر خاص , بس لو يعني شيء يخصني انا لوحدي فلأ لانها تخص برضه كل اللي هيشوفها او يدخلها
    هل تسبب المدونات بتغير ايجابي لافكارك؟اعطني مثال ف حالة نعم
    اكيد طبعا هي بتغير في التفكير , مثلا البوست بتاع شغف مش عن العشق والهوي اللي فعلا خلاني اتحمس لاني اشوف الفيلم .. ده المثال اللي جه في بالي
    هل تكتفي بفتح صفحات من يعقبوك بردود ف مدونتك ام تسع لاكتشاف المزيد؟
    والله مش شرط اني افتح مدوناتهم اصلا , فتح مدونات الناس التانيين لازم يكون له طقوس معينه مرتبطه بالحاله المزاجيه اللي الواحد فيها , يعني مش شرط اني الاقي شخص ما معلق عندي اني اروح في ساعتها واشوف مدونته, بس اكيد انها اول مدونه هشوفها
    ماذا يعني لك عدد الزوار ...هل تهتم بوضعه؟
    فعلا يهمني اني اشوف كام ضحيه دخلت عندي النهارده , نظام عد اليوميه والايراد
    هل حاولت تخيل شكل اصدقائك المدونين؟
    حاولت بس مش كتير وغالبا بفشل
    هل ترى فائدة حقيقية للتدوين:؟
    اكيد ليه فايده , زي كتابه الشعر كده بالظبط
    هل تشعر ان مجتمع المدونين مجتمع منفصل عن العالم المحيط بك ام
    متفاعل مع احداثه؟
    اكيد متصل , لان المدونين ناس من ضمن المجتمع , فاكيد انهم بيكتبوا عن اللي جواهم اللي هو اكيد مرتبط بالمجتمع
    هل يزعجك وجود نقد ف مدونتك ام تعتبره ظاهرة صحية؟
    نفسي اشوف النقد ده , اللي تقريبا ملقيتوش في اي مدونه لحد دلوقتي
    تخاف من بعض المدونات السياسية وتتحاشها؟ هل صدمك
    اعتقال بعض المدونين؟
    معتقدش انه في حد لسه بيخاف من السياسه
    اكيد اي اديب بيتكلم من قلبه لازم ميعجبش ناس كتيره , ومعتقدش ان اي اديب يكره انه
    يخش المعتقل , انا فعلا قابلت بعض المدونين اللي نفسهم يدخلوا المعتقل
    هل فكرت بمصير مدونتك حال وفاتك؟
    الله يبشرك بالخير
    آخر سؤال : تحب تسمع أغنية إيه- بلاش صيغة آمال فهمى دى -
    ما الاغنية التى تحب وضع اللينك الخاص بها فى مدونتك؟
    عايز احط اللينك بتاع اغنيه عبد المنعم مدبولي اللي بيتكلم فيها عن ايام زمان
    وأخيراً أمرر التاج لكل من

    03‏/09‏/2006

    . . . . . . .

    كان يجلس وحيدا
    ينظر لي .. وفي عينيه رجاء
    اجلسته معنا
    . . . . . .
    ..بعد يومين
    ..كان يضحك معهم
    ينظر لي وفي عينيه تحدي
    ..بينما
    اجلس انا وحيدا

    11‏/08‏/2006

    تلات سلامات يا واحشني

    اليها . . . في منفاها البعيد
    علهــــا يومــــا تعــــــود
    ..............................................................
    تلات سلامات
    يا واحشني تلات تيام
    بايدي سلام
    وعيني سلام
    و قلبي سلام
    بعادك يا جميل طول
    وده اول بعاد بيطول
    تلات تيام يا روح قلبي
    وانا جنبي حسود و عزول
    يقسوني عليك ماقسى
    ينسوني هواك مانسى
    يا مالي الدنيا في عنيا
    تلات سلامات
    و شويه تلات سلامات
    عرفت الوحده ايه هي
    و ايه ايامي في بعادك
    و شفتك هانت الدنيا
    ولا فكرت في عتابك
    و اعاتبك ليه و انا بحبك
    و اقولك ايه و انا بحبك
    يا مالي الدنيا في عنيا
    تلات سلامات
    و شويه تلات سلامات
    عيونك سود و اقول مش سود
    عشان الناس تتوه عنك
    و اصونك من حسود و عزول
    و اغير حتى عليك منك
    ولو قلبك سأل قلبي
    هيعرف قد ايه حبي
    يا مالي الدنيا في عنيا
    تلات سلمات
    و شويه تلات سلامات
    ................................................................................
    استمتعوا بها
    ...................................

    08‏/08‏/2006

    وفـــــــــــــــاء

    لن اسافر واتركك -
    اذهب وسانتظرك -
    ..قبلها وسافر
    ..ثلاثون عاما .. وعاد
    في احدي يديه حقيبه اوراقه السوداء .. وفي الاخري حفيدته الجميلة
    .. .. .. .. ..
    ..قبلت صورته ثم مزقتها
    وذهبت تبحث عن عريس

    26‏/07‏/2006

    حنين

    ...كان يبدو واثقا
    علي الرغم من قلبه المحتل بالهموم
    ..وصلته رسالتها
    ..أطبق رسالتها في احدي يديه
    وبيده الاخري.. امسك النجوم

    10‏/06‏/2006

    احنا مين

    احنا شويه شباب زي الورد قلنا نغير العالم كله
    ولاننا مش بنياس ولان الناس كلها بتقول كان غيركم اشطر
    فاحنا قررنا اننا نثبت للعالم كله اننا نقدر نغيره
    فعلشان كده عملنا الجروب ده
    علشان نغير العالم
    فلو لقيت نفسك عندك استعداد انك تشارك معانا , ولو لقيت نفسك قادر علي التغيير معانا, ولو شايف نفسك ممكن تستحمل وما تياسش
    فيلا , مستني ايه
    شارك معانا